Asturies ye, xuntu con Galicia una tierra micófoba tradicionalmente, esto espéyase’n que nun tenemos recetes culinaries pa cocinales y en que ni siquiera tenemos pallabreru pa identificar la bayura d’especies que podemos atopar, si acasu los oreyones que crecen apegaos al corteyu de los árboles o los peos de llobu, o de raposu ( Lycoperdom perlatum) ensin dengún valír gastrónomicu pero que llegaben a emplegase faciendo les veces de polvos de talcu pa les rozadures de los rapacinos pequeños. En muchos conceyos asturianos les setes reciben el nombre xenéricu de cogordies, pero también otros nomatos que falen d’esa micofobia ancestral. Pan de culiebra, pan de sapu, pan de bruxes, etc…
Quiciabes el venceyu de les setes alucinóxenes al fenómeno de la bruxería seya una de les causes, aunque n’ Euskadi o Catalunya diose igualmente y cuenten con una llarga tradición culinaria. También llama l’atención que’l campesín asturianu enxamas reparase que yeren comestibles cuando ta viendo a les sos vaques fartucase de champiñones, sobre too nos tiempos de la fame na posguerra cuando la xente naguaba por echar daqué a la boca y nun dispreciaba nin siquiera los fayucos.
Nes Arriondes, capital del conceyu de Parres esta s’alcuerden de comu allá pelos años cuarenta un vecin, que tuviere per Catalunya, vieno, recoyó delles setes y pidió permisu na sidrería “El Submarino” pa cocinales y comeles en compañía los amigos, delantre de la xente, ablucada, de la sidrería.
D’oriente a Occidente, la seta ye dalgo que nun se come pero’l trabayu de campu, ufiertonos una islla nel país de la micofobia, nel Valle’l Güerna, conceyu Llena a topamos tradición grastronómica coles setes dellos informantes, pastores principalmente, alcuérdense de cómu los sos güelos y bisgüelos coyien setes pa comeles, curiosamente na más que nos pueblos que queden p’arriba de Teyeu, comu son La Cruz, Tuiza o Riospasu. Pol valir del datu ufertamosvos equí la transcripción de la información algamada:
“Equí cuando tábimos de pastores comíemos les setes, que llamemos cogordas, coyemosles pela primavera. Hai unes que salen per Abril, que llamemos San Bernardu, son arreondiaes y blanquines, comíense frites, en tortiella o con xamón o chorizu si lu había. Tamién coyíemos otra que tien un pocu d’aniellu per baxu y rayá per baxu’l sombreru (-con lámines-) que llamemos La Pardina. Cóyiese también pela primavera. Eso va tiempu que les comíen los pastores. Tamién había un peisenu, César, que va más de cincuenta años, andaba a elles pero esi yera pa llevales a vender a Uviéu.”
Contau por Ulpiano Delgado Arias 77años natural de Xomezana, criau na Cruz – conceyu Llena - Recoyío’l 13 – Mayu – 2011.
Por desgracia non tubiemos tiempo pa identificar la pardina y la San Bernardu, llamonos tamién l’atención que los pastores namás recoyeren setes na primavera y nun lo ficieren na seronda, quiciabes antiguamente n’esta época del añu les mayaes tuvieren ya nevaes o ficiere muncho más friu qu’agora. Otru testumoniu nesi sen ye’l siguiente:
“Equí comemos les setes, primeru cocíense un pocu y dempués frites o en tortiella. Equí, per baxu coyiense n’Abril y pal puestu Vallouta y Las Navariegas cogíense hacia Mayu. Comíemosles los pastores.”
Contau por Emilio Delgado Delgado 78 años natural de Riospasu – conceyu Llena – Recoyío’l 13 de Mayu de 2011.
Esta tradición contrasta col restu’l conceyu (y d’Asturies) onde les setes nun se comen, pero al parecer ya bien de muy antiguo, anque los sos anicios quiciabes enxamás lleguemos a descubrilos.
Por Alberto Álvarez Peña.
